早兩日同個史友傾起剛過身冇耐嘅「饒老」饒宗頤，史友言談間對饒老嘅尊敬擺晒上面度，亦因為咁引起阿史興趣去搵少少關於饒老嘅資料。饒老背景同威水史，大家都耳熟能詳，但原來佢同廣東惠州都有一段淵源喎。

話說饒老對惠州歷史文化，特別係「東坡寓惠文化」有特殊感情，佢曾經多次親自去到惠州參加文化交流活動。2012年，饒老接受內地傳媒採訪，公開呼籲重修惠州蘇東坡祠，因為「東坡文化」係惠州重要文化遺產之一。

饒老嘅呼籲，據講好快就傳到時任中央政治局委員、廣東省委書記汪洋（即係而家全國政協主席）嘅重視，亦因為咁，重修蘇東坡祠嘅提案好快被提上惠州市政府嘅工作清單。

最終，喺2013年4月，惠州市政府通過《重修惠州東坡祠建設方案》，決定高標準重修蘇東坡祠，原因係要傳承惠州文脈、凸顯城市文化底蘊咁話。當時亦決定，重建時會依照「文物標準」進行。

饒老方面，佢知道自己呼籲得到回應當然好開心，身在香港嘅佢更加即席揮毫題寫「惠州蘇東坡祠」匾額送畀惠州，呢塊匾額今日當然就掛喺蘇東坡祠大門上面。

請返蘇東坡祠，佢位於惠州市橋東歷史城區範圍內，總用地面積約3.36 萬平方米；而根據史料考證，嗰度亦保留咗東坡井、古階步道、古樹名木等歷史遺跡，修復東坡祠、娛江亭、朱池、墨沼、翟夫子舍、林婆酒家等歷史要素。

請到尾，到底呢個蘇東坡祠有咩咁特別？最特別咪就係，佢係蘇東坡「真故居」囉！

圖片嚟自網絡